渾水呢個筆名，第一次聽覺得幾 kai。
當然，未有渾水這個筆名之前，他其實叫史丹利。那是《主場新聞》的年代，當人人都在追捧那幾個如雷貫耳的博客名字，我就是喜歡那個沒有人認識的毒男。
2013 年 9 月 10 日，我在《蘋果》這樣寫：
//《主場新聞》有位博客，筆名史丹利，一個二十出頭的後生仔。這位小伙子的作品，題材廣泛，起初覺得他行文風格奇奇怪怪，但看多幾篇，越看越舒服，越舒服就越喜歡。用他的眼睛看世界，我得到樂趣和啟發。最喜愛的《主場》博客，史丹利是我心目中的三甲。//
看完我這樣寫之後，他感謝我，並希望跟我見面。
基於露出真身其實斑點滿身的自卑感，我沒有見他，只說「終有一天會見的」。
結果這個「終有一天」，是最少一千天後才發生的事。
第一次見面，連我自己都不敢相信，好似同女人 date 一樣。
其實仲直接過同女人 date。
以下內容，如果騙你半個字，呢世冇發達。
我嗰日特登請咗假，約咗佢喺銅鑼灣見面。
見面之後，佢問我想去邊，我用咗兩秒判斷佢究竟係一個正常人定係不正常人，直覺嘅結論係後者。
但我比他更不正常，因為我提議去我屋企。
就係咁，佢返咗我屋企。
上咗嚟之後，我哋入咗書房。
我畀佢坐我平時寫嘢坐嗰個位，自己就坐喺對面嗰張按摩椅。
短短一個鐘，我哋經歷咗幾個層次嘅交流，由精神上，到物質上，再到肉體上，例如拍膊頭。完事後，我們吃了神交一千日之後的第一頓飯，好 casual，喺一間叫 Boathouse 嘅餐廳。
吃完飯，我專登車番佢出去，唔係因為我好客，係因為我想爭取時間同佢講多兩句。
自從那天之後，我已經數唔到見過渾水幾多次。
史丹利好，渾水又好，我想講三樣嘢。
第一，好多人同我講，渾水惹火，容易得罪人，唔好同佢行咁近。講真，屋企都上埋，已經近無可近。我交朋友嘅原則好簡單：只要價值觀相近，惹不惹火其實好閒，反而嗰啲八面玲瓏但笑裏藏刀嘅人更恐怖。
第二，他是那種可以為了大局將自己利益放到很後的異數。看他文字有這種感覺，認識之後更加肯定感覺是對的。不少人知道我認識他之後，不停跟我說，渾水個人「其實」係點點點點點。想說，他們形容的那一面「其實」，我沒有體驗過；也想說，他們無法認識我認識渾水那一面，恐怕是能力或層次問題。
第三，他有點複雜，既自信，也自卑。自信嗰啲唔使講，我想講自卑。有一次，我話，喂，你篇嘢寫得幾好，我會 share；點知佢叫我唔好 share，「唔好同我呢種人成一陣線，會傷到你啲羽毛。」唔知畀咩反應，因為呢啲對白，真係拍戲先有。「唔好對我咁好，我會累咗你。」被一個毒男感動，是難以形容的心理狀態。
右手放心口，在心中。
P.S 有一次渾水識到個女仔，但怕怕醜醜唔敢同人攞電話 (個女仔仲要係佢嘅中大師妹)。同佢賭咗五舊水，我話我可以令個女仔主動畀電話佢。最後我當然成功咗，但水哥仲未找數。(but to be fair he didn’t accept the bet)
Search